ချစ်တီးတေဇ..ကောက်သင်းတောင်မချန်ကောက်မှတော့ (ဆရာစံရေ..ဂဠုန်ထကြစို့ ရဲ့ဗျာ)

ဦးတေဇ၏ ထူးကုမ္ပဏီ လက်အောက်ခံ ဧရာဒယ်လ်တာကုမ္ပဏီထံမှ မိုးစပါးစိုက်ပျိုးစရိတ် ချေးငွေယူထားသော ဒေးဒရဲ၊ ဖျာပုံနှင့်
ကျိုက်လတ်ဒေသခံ တောင်သူတို့သည် ငွေသားအစား စပါးကို ကာလပေါက်ဈေးဖြတ်၍ပြန်ဆပ်ရမည်ဆိုခြင်းကြောင့် မကျေမနပ် ဖြစ်နေကြသည်။

“ကျနော်တို့က ငွေယူထားတာ။ ငွေပဲ ပြန်ပေးနိုင်မယ်။ ဒါကို သူတို့က လက်မခံဘူး။ ကတိအတိုင်း ငွေဆပ်၊ စပါးဆပ် သူတို့ လက်ခံရမယ်။ နောက်ဆုံး ကျနော်တို့က စပါးပြန်ဝယ်ပြီး ဆပ်မယ်လုပ်တော့ စပါးဈေးက မြောက်သွားပြီ။ ရောင်းတုန်းက (၃၆၀,၀၀၀) ကျပ်၊ ပြန်ဝယ်တော့ (၄၁၀,၀၀၀) ကျပ် ဖြစ်နေပြီ။
ဒီတော့ ဧရာဒယ်လ်တာက ချေးငွေယူထားတဲ့ ကျိုက်လတ် တနယ်လုံး ဘယ်သူမှ စပါးပြန်မသွင်းကြဘူး” ဟု ကျိုက်လတ်မြို့နယ်၊ ငပွေးတန်းစာဖြူစုကျေးရွာ တောင်သူတို့က ပြောသည်။

၂၀၀၉ ခုနှစ်တွင် ဧရာဒယ်လ်တာ ကုမ္ပဏီ၊ ဧရာဒယ်လ်တာ ဆန်စပါးအထူးပြုကုမ္ပဏီနှင့် ဒဂုံအင်တာနေရှင်နယ် ကုမ္ပဏီတို့သည်
ကျိုက်လတ်မြို့ စပါးစိုက်တောင်သူတို့အား နယ်မြေအပိုင်းအခြားခွဲ၍ (၂) ရာခိုင်နှုန်း အတိုးဖြင့် ချေးငွေများ ထုတ်ပေး ခဲ့ကြစဉ်က “မိုးစပါးပေါ်လျှင် ဒေသပေါက်ဈေးအတိုင်း ငွေသား (သို့မဟုတ်) စပါးကို အတိုးရော အရင်းပါ ပြန်လည်ပေးဆပ်ရမည်” ဟု ပြောဆိုခဲ့ကြောင်း ဒေသခံတို့ထံမှ သိရသည်။

သို့သော် ၂၀၁၀ ဇန်န၀ါရီ မိုးစပါးပေါ်၍ တောင်သူတို့ ချေးငွေပြန်ဆပ်သောအခါ ဧရာဒယ်လ်တာမှ ငွေသားကို လက်မခံဘဲ စပါးကိုသာ ပေးရမည်ဟု ဖိအားပေးခဲ့ကြောင်း ကျိုက်လတ် ဒေသခံတောင်သူတို့က ပြောသည်။

ထင်းကွင်းကျေးရွာ တောင်သူတဦးက “ကျိုက်လတ်မှာ ဒဂုံအင်တာနေရှင်နယ်လည်း (၂) ရာခိုင်နှုန်တိုးနဲ့ ငွေချေးနေတာပဲ။ စပါးပေါ်လို့ ငွေဆပ်ဆပ်၊ စပါးဆပ်ဆပ် အကုန်လက်ခံတယ်။ ဧရာဒယ်လ်တာကျမှ စပါးပဲ ပေးသွင်းရမယ်။ ငွေကို လက်မခံဘူး ဖြစ်နေတယ်။ ဒီတော့ ကလပ်ရပ်၊ သမက်ပြေ၊ မယ်ဇလီကုန်း၊ ထားဝယ်မှိုင်း၊ကျီးချောင်း၊ အုန်းပင်စု အပါအ၀င် ဘယ်သူမှ စပါးမဆပ်ရသေးဘူး” ဟု ပြောသည်။

တင်းမာနေသော အဆိုပါအနေအထားကြောင့် ဧရာဒယ်လ်တာ ကုမ္ပဏီသည် လတ်တလောတွင်တောင်သူတို့၏ ငွေအသွင်း၊ စပါးအသွင်း ကို ယာယီဆိုင်းငံ့ထားသည်ဟု သိရသည်။

ကျိုက်လတ်မြို့ ဆန်စက်လုပ်ငန်းရှင်တဦးက “ဧရာဒယ်လ်တာက စပါးပဲ လိုချင်တဲ့ အာသီသ ရှိနေတယ်။ တောင်သူတွေ ချေးငွေပြန်ဆပ်တာ ယူလိုက်ပေါ့။ တောင်သူဆိုတာ ကိုယ့်စပါးကို ရောင်းချင်တဲ့သူကို ရောင်းတယ်။ ရောင်းချင်တဲ့ဈေးရောင်းတယ်။ အခြင်အတွယ်ကအစ ကိုယ့်ကုန်သည်ပဲ ကိုယ်ယုံကြတယ်။ ကုမ္ပဏီလက်စပါးထိုးမပေးချင်ကြဘူး” ဟု ပြောသည်။

ယင်းဖြစ်စဉ်နှင့် ပတ်သက်၍ ဆန်စပါး အထူးပြုကုမွဏီ (၂၉) ခုဖြင့် ဖွဲ့စည်းထားသော မြန်မာနိုင်ငံ ဆန်စပါးအသင်းသို့ ဆက်သွယ်မေးမြန်းရာ တာဝန်ရှိသူတဦးက “စပါး (သို့မဟုတ်) ငွေသား (သို့မဟုတ်) ဆန်ကို ကာလပေါက်ဈေးဖြတ်ပြီး ယူရမယ်လို့ ကုမွဏီအားလုံးကို အသိပေးပြီးသားဖြစ်ပါတယ်” ဟုသာ ဖြေကြားခဲ့ပြီး ကျိုက်လတ်တောင်သူတို့၏ လက်ရှိအခြေအနေမှန်ကို တင်ပြမေးမြန်းရာ ၎င်းက ဖြေဆိုရန် ငြင်းဆန်ခဲ့သည်။

ဆန်စက်ပိုင်ရှင်တဦးက “ဒီနယ်တွေက လယ်မြေအမျိုးအစားညံ့တယ်။ မိုးစပါး (ဇီယာနှံကား) တဧက (၂၅) တင်း လယ်မြေတိုင်း မထွက်ဘူး။ ဒီကြားထဲက ငွေသွင်းရင် ငွေယူလိုက်ပေါ့။ နွေစပါး (သီးထပ်ယဉ်) က ဧပြီလလယ် ထွက်တော့မယ်။ အထွက်နှုန်း နည်းရင် ပြဿနာ ပိုကြီးလာနိုင်တယ်” ဟုခန့်မှန်းပြောကြားသည်။

လွန်ခဲ့သော (၇) နှစ်ခန့်ကလည်း ဗိုလ်ချုပ်ကြီး သူရရွှေမန်း ဧရာဝတီတိုင်းမှူးတာဝန် ထမ်းဆောင်ခဲ့စဉ်က ၎င်း၏သား သက်မန်း ကိုကို၏ “ဧရာရွှေဝါ ဇီဝမြေသြဇာ” ကို တောင်သူတိုင်း မယူမနေရ အဓမ္မဖြန့်ဝေခဲ့ခြင်းအပေါ်အာဏာပိုင်နှင့် ဒေသခံတောင်သူတို့ ပဋိပက္ခအသွင် သဘောထားတင်းမာမှုများဖြစ်ခဲ့ကြဖူးသည်။