ဖနိဒါ
အင်္ဂါနေ့၊ အောက်တိုဘာလ 07 2008 17:54 - မြန်မာစံတော်ချိန်
ချင်းမိုင်။ ။ မရှိဆင်းရဲသားများအား ဆန်လှူဒါန်းခဲ့သူ ဦးစိုးမြင့်ထိန်နှင့် အမျိုးသား ဒီမိုကရေစီ အဖွဲ့ချုပ်ဝင် ၃ ဦးအား ယမန်နေ့က အင်းစိန်ထောင်တွင်းရှိ အရှေ့ပိုင်းခရိုင် တရားရုံးက ထောင်ဒဏ်များ ချမှတ်လိုက်သည်။
ရန်ကုန်တိုင်း မြောက်ဥက္ကလာပတွင် နေထိုင်သူ ဒီမိုကရေစီနှင့် ဖွံ့ဖြိုးတိုးတက်ရေး လိုလားသူများအဖွဲ့ဝင် ဦးစိုးမြင့်ထိန်အား ၄ နှစ်ခွဲနှင့် တောင်ဒဂုံမှ အန်အယ်ဒီ အဖွဲ့ဝင်များဖြစ်သည့် ဒေါ်ခင်အေး၊ ဒေါ်မြင့်သိန်းနှင့် ဦးစိုးကြွယ်တို့အား ၂ နှစ်ခွဲစီ ပြစ်ဒဏ် ချမှတ်လိုက်ခြင်း ဖြစ်သည်။
"အဖေ့ကို ၄ နှစ်နဲ့ ၆ လ ချလိုက်ပါတယ်။ ပုဒ်မ ၃ ခုနဲ့ ချလိုက်တယ်။ ၅၀၅ (ခ)၊ ၁၄၃၊ ၁၄ရ တို့ပေါ့နော်။ အဖေနဲ့အတူ ၃ ယောက်ကိုလည်း ၂ နှစ် ချလိုက်တယ်" ဟု ဦးစိုးမြင့်ထိန်၏ သမီးဖြစ်သူက မဇ္ဈိမကို ပြောသည်။
ဦးစိုးမြင့်ထိန်သည် နိုင်ငံတော် လုံခြုံရေးကို ထိခိုက်စေရန် လှုံ့ဆော်မှု ပုဒ်မနှင့် တရားမ၀င် လူစုလူဝေးတွင် ပါဝင်မှုတို့ဖြင့် ချမှတ်ခံရခြင်းဖြစ်ကာ ၂၀၀၇ ခုနှစ် စက်တင်ဘာလအတွင်း အဖမ်းမခံရမီက ယခုအခါ နိုင်ငံရေးမှ အနားယူသွားပြီဖြစ်သော အမျိုးသားရေး ဦးဝင်းနိုင်နှင့်အတူ ရွှေပေါက်ကန်၊ တောင်ဒဂုံ၊ မြောက်ဒဂုံ စသည့် ရပ်ကွက်များအတွင်း ဆန်လှူဒါန်းမှုတွင် ပါဝင်ခဲ့သည်။
၂၀၀၇ ခုနှစ် ရွှေဝါရောင် လှုပ်ရှားမှုဖြစ်သည့် စက်တင်ဘာလ ၂၄ ရက်နေ့တွင် အမျိုးသားရေး ဦးဝင်းနိုင်၊ ဟာသပညာရှင် ဇာဂနာ ခေါ် ဒါရိုက်တာ ကိုသူရ၊ နိုင်ငံကျော် ရုပ်ရှင်မင်းသား ကိုကျော်သူနှင့်အတူ သံဃာတော်များအား ဆွမ်းကပ်လှူခဲ့ပြီး နောက်တရက်တွင် အာဏာပိုင်များက ဖမ်းဆီးခဲ့ပြီး အန်အယ်ဒီအဖွဲ့ဝင်များအား သြဂုတ်လအတွင်း အစိုးရက လောင်စာဆီဈေးနှုန်း မြှင့်တင်လိုက်သည်ကို လမ်းလျှောက် ဆန္ဒပြသဖြင့် ဖမ်းဆီးခံခဲ့ရသည်။
ဦးစိုးမြင့်ထိန်အား နိုင်ငံတော် လုံခြုံရေးကို ထိခိုက်ရန် လှုံ့ဆော်မှု ပုဒ်မ ၅၀၅(ခ)၊ တရားမ၀င် တရားမ၀င် လူစုလူဝေးတွင် ပါဝင်မှု ပုဒ်မ ၁၄၃ နှင့် ရုန်းရင်းဆန်ခတ်မှုကို ဖြိုခွဲရန် အမိန့်ပေးသည်ကို ဖီဆန်မှု ပုဒ်မ ၁၄၇ တို့ဖြင့် ထောင်ဒဏ်ချမှတ်သည်။ အန်အယ်ဒီ အဖွဲ့ဝင်များကိုမူ ပုဒ်မ ၅၀၅ (ခ) နှင့် ပုဒ်မ ၁၄၃ တို့ဖြင့် ပြစ်ဒဏ်ချခြင်း ဖြစ်သည်။
သမီးဖြစ်သူက "အရင်ကလည်း ခဏခဏ အဖမ်းခံခဲ့တယ်လေ။ ကျမ ငယ်ကတည်းကပဲ။ ဒီတခါကျတာက အကြာဆုံးပဲဆိုတော့ စိတ်မကောင်းဘူး။ ဒါပေမဲ့ အဖေ့အတွက် ဂုဏ်ယူတယ်။ ကောင်းတဲ့ ကိစ္စကို လုပ်တဲ့အတွက် သမီးတို့ဂုဏ်ယူပြီးသားပဲ" ဟု ပြောသည်။
ဦးစိုးမြင့်ထိန်အတွက် အယူခံဝင်ရန် လျှောက်ထားခဲ့သည်ဟု ဗဟိုတရားရုံးချုပ် ရှေ့နေ ဦးအောင်သိန်းက ပြောသည်။
အလားတူပင် ရွှေဝါရောင် လှုပ်ရှားမှုတွင် ပါဝင်လှုပ်ရှားစဉ် အာဏာပိုင်များဘက်က ပစ်ခတ်သဖြင့် သေနတ် ဒဏ်ရာရရှိခဲ့သူ အဖွဲ့ချုပ်လူငယ် ကိုမြသန်းထိုက်ကိုလည်း ယခုလ ၃ ရက်နေ့က ထောင်ဒဏ် ၄ နှစ် ချမှတ်ခဲ့သည်။
ထိုင်းနိုင်ငံအခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေးအသင်း (မြန်မာနိုင်ငံ) AAPP နှင့် အမေရိကန်အခြေစိုက် မြန်မာ့အရေး လှုပ်ရှားသူများ ဘားမားကန်ပိန်း အဖွဲ့တို့၏ အစီရင်ခံစာတွင်
ယခုနှစ် ဇွန်လတွင်က နိုင်ငံရေးအကျဉ်းသား ၂၁၂၃ ကျော်ရှိနေသဖြင့် ယမန်နှစ်နှင့် နှိုင်းယှဉ်လျှင် ၁၁၉၂ ဦး ပိုများလာသည်ဟု ဖော်ပြထားသည်။
သို့သော် မြန်မာအာဏာပိုင်များက ပြီးခဲ့သည့် စက်တင်လာလ ၂၃ ရက်နေ့တွင် နိုင်ငံတဝှမ်း အကျဉ်းထောင်များရှိ အကျဉ်းသား ၉ဝဝ၂ ဦး လွှတ်ငြိမ်းချမ်းသာခွင့် ပေးခဲ့ရာ နိုင်ငံရေး အကျဉ်းသား ၉ ဦးသာ ပါဝင်ခဲ့သည်။
Tuesday, October 7, 2008
ဆန်လှူသူ ဒီချုပ်အဖွဲ့ဝင် ၄ ဦး ထောင်ဒဏ် ချခံရ
Subscribe to:
Post Comments (Atom)
No comments:
Post a Comment