ကိုထွေး Friday, June 04, 2010
မြန်မာနိုင်ငံသို့ နှစ်ရက်ကြာခရီး လာရောက်ခဲ့သည့် တရုတ် ၀န်ကြီးချုပ် ၀မ်ကျားပေါင်သည် ၂၀၁၀ ရွေးကောက်ပွဲနှင့် တိုင်းရင်းသား အရေး ကိစ္စရပ်များကို ဗိုလ်ချုပ်မှူးကြီး သန်းရွှေနှင့် နေပြည်တော်တွင် ဆွေးနွေးခဲ့ကြောင်း သံတမန် အသိုင်းအ၀န်းက ဆိုသည်။
ပြီးခဲ့သည့် ဗုဒ္ဓဟူးနေ့က မြန်မာနိုင်ငံသို့ ရောက်ရှိလာသော မစ္စတာ ၀မ်ကျားပေါင်သည် ဗိုလ်ချုပ်မှူးကြီး သန်းရွှေနှင့် နေပြည်တော်ရှိ ဇေယျာသိရီ ဗိမာန်၌ ယမန်နေ့ နံနက် ၁၀ နာရီခွဲခန့်က တွေ့ဆုံခဲ့ခြင်း ဖြစ်သည်။
[တရုတ် ၀န်ကြီးချုပ် ၀မ်ကျားပေါင်နှင့် ဗိုလ်ချုပ်မှူးကြီး သန်းရွှေ ယမန်နေ့က နေပြည်တော်တွင် တွေ့ဆုံစဉ် (ဓာတ်ပုံ - AP)]
တရုတ် ၀န်ကြီးချုပ် ၀မ်ကျားပေါင်နှင့် ဗိုလ်ချုပ်မှူးကြီး သန်းရွှေ ယမန်နေ့က နေပြည်တော်တွင် တွေ့ဆုံစဉ် (ဓာတ်ပုံ - AP)
၂၀၁၀ ရွေးကောက်ပွဲတွင် အားလုံး ပါဝင်ခွင့်ရရေး အတွက် တရုတ် ၀န်ကြီးချုပ်က စစ်ခေါင်းဆောင်များကို တိုက်တွန်းခဲ့ကြောင်း သံတမန် အသိုင်းအ၀န်းက ပြောသည်။
အဆိုပါသတင်းနှင့် ပတ်သက်၍ ဧရာဝတီက ရန်ကုန်အခြေစိုက် တရုတ်သံရုံးကို ဆက်သွယ်ခဲ့သော်လည်း အတည်ပြုခြင်း မရှိ သကဲ့သို့ ငြင်းပယ်ခြင်း မပြုခဲ့ပေ။
အစိုးရပိုင် သတင်းစာများက စီးပွားရေး ပူးပေါင်း ဆောင်ရွက်မှု တိုးမြှင့်ရေး၊ ချစ်ကြည်ရင်းနှီးမှု တိုးမြှင့်ရေး၊ ဒေသတွင်းနှင့် နိုင်ငံ တကာတွင် ပူးပေါင်းဆောင်ရွက်ရေး၊ ၂ နိုင်ငံ နယ်စပ်ဒေသ တည်ငြိမ်အေးချမ်းရေးနှင့် ဖွံ့ဖြိုးရေးအတွက် ပူးပေါင်း ဆောင်ရွက်ရေး စသည့် နှစ်နိုင်ငံအတွက် အလေးထား ဆောင်ရွက်ဖွယ်ရာ ကိစ္စရပ်များနှင့် စပ်လျဉ်း၍ ခင်မင်ရင်းနှီးစွာ ဆွေးနွေးကြောင်း ဖော်ပြ ထားသည်။
“နှစ်နိုင်ငံ အကြား ထားရှိခဲ့တဲ့ ချစ်ကြည်ရင်းနှီးမှု အစဉ်အလာကောင်းဟာ တအူတုံဆင်း ညီအစ်ကို “ပေါက်ဖော်” ဆိုတဲ့ ရင်းနှီးမှု ဆက်ဆံရေးကို ဖြစ်ထွန်းစေခဲ့ ရှိခဲ့ပါတယ်၊ ပေါက်ဖော်ဆိုတဲ့ အသုံးအနှုန်းဟာ မြန်မာနိုင်ငံနဲ့ တရုတ်နိုင်ငံတို့ အကြားမှာသာ ဖြစ်ထွန်း တည်ရှိနေတာဖြစ်ပါတယ်”ဟု ၀န်ကြီးချုပ် ဦးသိန်းစိန်၏ ပြောကြားချက်ကို သတင်းစာတွင် ဖော်ပြထားသည်။
တရုတ် နိုင်ငံသည် မြန်မာပြည်၏ လူ့အခွင့်အရေး ချိုးဖောက်သည့် ကိစ္စရပ်များနှင့် ပတ်သက်၍ ကုလသမဂ္ဂ လုံခြုံရေး ကောင်စီတွင် အကာအကွယ် ပေးလေ့ရှိသဖြင့် မြန်မာပြည်၏ ရွေးကောက်ပွဲသည် တရုတ် အတွက် အရေးပါလျက် ရှိသည်။
တရုတ် မြန်မာနယ်စပ်အခြေစိုက် စစ်ရေးလေ့လာသူ ဦးအောင်ကျော်ဇောက“တရုတ် မြန်မာ ဆက်ဆံရေး နှစ်ပေါင်း ၆၀အတွင်းမှာ တရုတ်က မြန်မာ့အရေးမှာ တစုံတရာ ၀င်ရောက် မစွက်ဖက်ဘူးလို့ပြောပေမယ့် ၀င်ရောက်စွက်ဖက်ခဲ့တယ်၊ အဲဒါတွေ အားလုံးဟာ သူ့အကျိုး စီးပွားအတွက်ပဲ”ဟု ဆိုသည်။
တရုတ်နိုင်ငံခြားရေး ၀န်ကြီးဌာန အင်တာနက်စာမျက်နှာတွင် မြန်မာနိုင်ငံ၏ တည်ငြိမ်ရေး၊ အမျိုးသား ပြန်လည် သင့်မြတ်ရေးနှင့် ဖွံ့ဖြိုးတိုးတက်ရေး အတွက် မျှော်လင့်ကြောင်း မစ္စတာ ၀မ်ကျားပေါင်က ၀န်ကြီးချုပ် ဦးသိန်းစိန်ကို ပြောသည်ဟုလည်း သတင်းစာ၌ ဖော်ပြထားသည်။
မစ္စတာ ၀မ်ကျားပေါင် ခရီးစဉ်အတွင်း ၂ နိုင်ငံဝန်ကြီးများနှင့် တာဝန်ရှိသူများက စီးပွားရေးနှင့် နည်းပညာ ပူးပေါင်းဆောင်ရွက်ရေး၊ ရထားပို့ဆောင်ရေး၊ ကုန်သွယ်မှု၊ ရေအားလျှပ်စစ်၊ စွမ်းအင်နှင့် သတ္တု တူးဖော်ရေး ဆိုင်ရာ သဘောတူ စာချုပ်များကို လက်မှတ် ရေးထိုးခဲ့ကြောင်း အစိုးရ သတင်းစာများတွင် ရေးသားထားသည်။
“ဒီတကြိမ် ခရီးစဉ်တွင် မြန်မာ နိုင်ငံ ခေါင်းဆောင်များနဲ့ ဆွေးနွေးပွဲ ပြုလုပ်ခဲ့ရာမှာ အကျိုးရလဒ်များစွာရရှိပြီး ကျယ်ကျယ်ပြန့်ပြန့် အမြင်တူညီမှုရ ရှိခဲ့ပါတယ်၊ ၂ ဦး ၂ ဖက်တို့ဟာလည်း အရေးကြီးတဲ့ စာချုပ်များလည်း လက်မှတ်ရေးထိုး ချုပ်ဆို ခဲ့ကြပါတယ်”ဟု မစ္စတာ ၀မ်ကျားပေါင်၏ ပြောကြားချက်ကို သတင်းစာတွင် ဖော်ပြထားသည်။
“တရုတ်နိုင်ငံဟာ မြန်မာနိုင်ငံအပေါ် စီးပွားရေး ကူညီမှုများ အစဉ်တစိုက် ကူညီပေးခဲ့ပြီး အကျိုးတူပူးပေါင်းဆောင်ရွက်မှုများ ပြုလုပ်ပေးခဲ့သည့်အတွက် တရုတ်နိုင်ငံ အစိုးရနဲ့ ပြည်သူများကို မြန်မာနိုင်ငံ အစိုးရနဲ့ ပြည်သူများက များစွာ ကျေးဇူးတင်လျက် ရှိပါတယ်၊ ၂ နိုင်ငံကြား ကဏ္ဍပေါင်းစုံ ပူးပေါင်းဆောင်ရွက်မှုများ ဖြစ်ထွန်းလာခြင်းနဲ့ အတူ ၂ နိုင်ငံ ဆက်ဆံရေးဟာ မဟာဗျူဟာ မြောက်ဆက်ဆံရေးသို့ တက်လှမ်းနိုင်ခဲ့ပြီ ဖြစ်ပါတယ်”ဟူသော ၀န်ကြီးချုပ် ဦးသိန်းစိန်၏ ပြောကြားချက်လည်း သတင်းစာတွင် ပါရှိသည်။
နှစ်နိုင်ငံ သဘောတူစာချုပ်ချုပ်ဆိုခြင်းသည် ၂ ဦး ၂ ဖက်စလုံး အကျိုးရှိသည့် ကိစ္စရပ်များဖြစ်ကြောင်း ရန်ကုန်မြို့ရှိ စီးပွားရေး ပညာရှင် ခင်မောင်ညို (ဘောဂ ဗေဒ)က ပြောသည်။
“မြန်မာ့စီးပွားရေး ဖွံ့ဖြိုးတိုးတက်ရေးအတွက် ကြီးကြီးမားမား အပြောင်းအလဲ ဖြစ်လာမယ်လို့တော့ မယူဆပါဘူး၊ မူဝါဒ ပြောင်းလဲဖို့ အတွက် ကြိုးစားတာမျိုးတွေ မရှိပါဘူး၊ ပုံမှန်လုပ်နေကျ လုပ်ရိုးလုပ်စဉ် တခုလို့ပဲ ယူဆပါတယ်”ဟု ၎င်းက ပြောသည်။
ဝန်ကြီးချုပ် ဦးသိန်စိန်နှင့် မစ္စတာ ၀မ်ကျားပေါင်တို့သည် မြန်မာ-တရုတ် ရေနံနှင့် သဘာဝ ဓာတ်ငွေ့ ပိုက်လိုင်းကို စတင်ဖွင့်လှစ်ပြီး ၂ နိုင်ငံ ချစ်ကြည်ရင်းနှီးမှု အထိမ်းအမှတ်အဖြစ် တရုတ်နိုင်ငံက ဆောက်လုပ်လှူဒါန်းခဲ့သည့် မြန်မာ အပြည်ပြည်ဆိုင်ရာ ကွန်ဗင်းရှင်း ဗဟိုဌာန လွှဲပြောင်းပေးအပ်သည့် အခမ်းအနားသို့လည်း တက်ရောက်ခဲ့ကြသည်။
မြန်မာနိုင်ငံမှ သဘာဝ ဓာတ်ငွေ့ နှင့် ရေနံ ဝယ်ယူမည့် တရုတ်နိုင်ငံသည် ရခိုင်ပြည်နယ် ကျောက်ဖြူမှ တရုတ်နိုင်ငံ ကူမင်းမြို့သို့ ပိုက်လိုင်းများ တည်ဆောက်သွားရန် သဘောတူညီခဲ့သည်။ တနှစ်လျှင် သဘာဝ ဓာတ်ငွေ့ တန်ချိန် ကုဗမီတာ ၁၂ ဘီလီယံ၊ ရေနံစည် ၄ဝဝ ဝဝဝ တင်ပို့မည် ဟု ဆိုသည်။
တရုတ်နိုင်ငံသည် မြန်မာနိုင်ငံရှိ သတ္တုတူးဖော်ရေး၊ ရေအားလျှပ်စစ်၊ ရေနံနှင့် သဘာဝဓာတ်ငွေ့ စသည့် စီမံကိန်း များတွင် စုစုပေါင်း ဒေါ်လာ ၁.၃၃ ဘီလီယံ ရင်းနှီး မြှုပ်နှံထားသည်။
ထိုင်း၊ ဗြိတိန်၊ စင်ကာပူနိုင်ငံများ ပြီးလျှင် တရုတ်သည် မြန်မာနိုင်ငံတွင် စတုတ္ထမြောက် အများဆုံး ရင်းနှီး မြှုပ်နှံသည့် နိုင်ငံ ဖြစ် သည်။
မြန်မာနိုင်ငံသည် စိုက်ပျိုးရေးထွက်ကုန်များ၊ သတ္တုများ၊ ကျွန်းသစ် နှင့် အဖိုးတန် ကျောက်မျက် ရတနာများ တရုတ်နိုင်ငံသို့ တင်ပို့သည်။ လျှပ်စစ်ပစ္စည်းများ၊ စက်ပစ္စည်းများ၊ အဝတ်အထည်နှင့် ဆေးဝါးများကို တရုတ်နိုင်ငံမှ တင်သွင်းခဲ့သည်။
မြန်မာစစ်အစိုးရသည် တရုတ်နိုင်ငံနှင့် ဆက်ဆံရေး ကောင်းမွန်လျက်ရှိသည်။ တရုတ် ဝန်ကြီးချုပ် ဝမ်ကျားပေါင်သည် မေ ၂၈ မှ ဇွန် ၃ အထိ တောင်ကိုရီးယား၊ ဂျပန်၊ မွန်ဂိုလီးယားနှင့် မြန်မာ ၄ နိုင်ငံ ခရီး သွားရောက်ခြင်းဖြစ်သည်။
ဝမ်ကျားပေါင်၏ ခရီးစဉ်သည် ၁၆ နှစ်တာကာလ အတွင်း ပထမဆုံးသော ၀န်ကြီးချုပ်အဆင့် ခရီးစဉ်ဖြစ်သည်။
မြန်မာနိုင်ငံသို့ နောက်ဆုံး လာရောက်လည်ပတ်ခဲ့သည့် တရုတ်အဆင့်မြင့် အရာရှိမှာ ၂၀၀၉ ဒီဇင်ဘာတွင် လာရောက်ခဲ့သည့် တရုတ် ဒုတိယသမ္မတ ရှီကျင့်ဖျင် (Xi Jinping) ဖြစ်သည်။ ရှီကျင့်ဖျင်က ဗိုလ်ချုပ်မှူးကြီး သန်းရွှေနှင့် တွေ့ဆုံစဉ် တရုတ်အနေ ဖြင့် မြန်မာနိုင်ငံကို နိုင်ငံရေး တည်ငြိမ်မှု၊ စီးပွားရေး ဖွံ့ဖြိုးမှုနှင့် အမျိုးသားရင်ကြားစေ့ရေး ဆောင်ရွက်မှုများ မြင်လိုသည်ဟု ပြောကြား ခဲ့ဖူးသည်။Rest of your post
No comments:
Post a Comment