ဒေါ်အောင်ဆန်းစုကြည်ကို လွှတ်ပေးသင့်ကြောင်း အန်အယ်လ်ဒီ ဗဟိုအမှုဆောင်များ ကင်တားနားထံ တင်ပြ

NEJ/ ၁၈ ဖေဖော်ဝါရီ ၂ဝ၁ဝ


မြန်မာနိုင်ငံသို့ (၅) ရက်ကြာခရီးစဉ်အဖြစ် ရောက်ရှိနေသော ကုလသမဂ္ဂ လူ့အခွင့်အရေးကိုယ်စားလှယ် မစ္စတာ သောမတ်စ် ကင်တားနားသည် အန်အယ်လ်ဒီ ဗဟိုအလုပ်အမှုဆောင် (၅) ဦးနှင့် ရန်ကုန်မြို့ မြရိပ်ညိုဟိုတယ်၌ ယနေ့ညနေ (၄) နာရီခွဲတွင် တွေ့ဆုံခဲ့သည်။

အန်အယ်လ်ဒီဗဟိုအလုပ်အမှုဆောင်များမှာ ဒု-ဥက္ကဋ္ဌ ဦးတင်ဦး၊ ဦးဝင်းတင်၊ ဦးခင်မောင်ဆွေ၊ ဦးသန်းထွန်းနှင့် ဦးညွန့်ဝေတို့ ဖြစ်သည်။

ဒု-ဥက္ကဋ္ဌ ဦးတင်ဦးက မစ္စတာကင်တားနားနှင့်တွေ့ဆုံရာတွင် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်အား လွှတ်ပေးသင့်ကြောင်း ပြောကြားသည်ဟု ဦးခင်မောင်ဆွေက ပြောသည်။

၎င်းက “၇၄ ခုနှစ် ဥပဒေက ပျက်ပြယ်သွားတာမို့လို့ (၁၀) က၊ ခ ဟာလည်း ပျက်ပြယ်တဲ့အတွက် လွှတ်ပေးရမယ်လို့ သူက ဆိုတယ်။ ၇၄ ခု (၁၀) က၊ (၁၀) ခ ကို ဥပဒေပြုတုန်းက သူကိုယ်တိုင်ပါဝင်တဲ့အတွက် ဥပဒေကြောင်းတွေကို သူကောင်းကောင်း နားလည်တယ်၊ သိရှိတယ်လို့ ပြောပြီးတော့ ဒေါ်အောင်ဆန်းစုကြည်ကို လွှတ်ပေးရလိမ့်မယ်လို့ သူဆိုပါတယ်” ဟု ပြောသည်။

ဗဟိုအလုပ်အမှုဆောင် (၅) ဦးအနေဖြင့် အဓိကဆွေးနွေးသည်မှာ ၉၀ ပြည့်နှစ် ရွေးကောက်ပွဲရလဒ်ကို တနည်းနည်းဖြင့် ဖော်ဆောင်နိုင်မှသာလျှင် ရှေ့နိုင်ငံရေးဆက်လျှောက်၍ဖြစ်မည်ဟု ပြောဆိုကြကြောင်း ဦးခင်မောင်ဆွေက ပြောသည်။

ထို့အပြင် “ဒေါ်အောင်ဆန်းစုကြည်နဲ့ တွေ့ဆုံဆွေးနွေးခွင့်ရမှသာလျှင် ရှေ့နိုင်ငံရေးခရီးမှာ လမ်းစပေါ်မယ်။ ရွေးကောက်ပွဲကိစ္စတွေဟာလည်း တွေ့ဆုံဆွေးနွေးခွင့်နဲ့ နှီးနွှယ်နေတော့ ရွေးကောက်ပွဲဝင်ရေး မ၀င်ရေးကအစ အန်အယ်လ်ဒီရဲ့ ရှေ့နိုင်ငံရေးခရီးကို ချမှတ်နိုင်မှာဖြစ်တယ်။ ဒီထက် အရေးကြီးတာကတော့ စီအီးစီနဲ့ ဒေါ်အောင်ဆန်းစုကြည်တွေ့ပြီးရင် ဒေါ်အောင်ဆန်းစုကြည်က တောင်းဆိုထားတဲ့ ဗိုလ်ချုပ်မှူးကြီးနဲ့ ဒေါ်အောင်ဆန်းစုကြည် တွေ့ရေးဟာ တိုင်းပြည်အတွက် အင်မတန်မှ အရေးကြီးတာ ဖြစ်တဲ့အတွက်ကြောင့်မို့ ဒီကိစ္စကို ကျနော်တို့ မဖြစ်မနေ မျှော်လင့်နေတယ်။ ဒါကိုလည်း ကုလသမဂ္ဂအနေနဲ့ ၀ိုင်းဝန်းပြီး ကူညီဖို့လိုအပ်တယ်ဆိုတာကိုလည်း မှာလိုက်ပါတယ်” ဟု ပြောဆိုကြကြောင်း ၎င်းက ဆက်လက်ပြောကြားသည်။

ယခုကဲ့သို့ တင်ပြပြောဆိုမှုများကို မစ္စတာကင်တားနားအနေဖြင့် မှတ်သားကာ ပြန်လည်အစီရင်ခံတင်ပြသွားမည်ဟု ပြောဆိုခဲ့ကြောင်း သိရသည်။

မစ္စတာကင်တာနားသည် မနက်ဖြန်တွင် နေပြည်တော်သို့ သွားရောက်ကာ နအဖစစ်အစိုးရ ခေါင်းဆောင်များနှင့် တွေ့ဆုံမည် ဖြစ်ပြီး ဒေါ်အောင်ဆန်းစုကြည်နှင့်လည်း တွေ့ခွင့်တောင်းခံထားကြောင်း သိရသည်။

မစ္စတာကင်တားနားသည် မြန်မာနိုင်ငံသို့ စတင်ရောက်ရှိသည့် ဖေဖော်ဝါရီ (၁၅) ရက်တွင် အန်အယ်လ်ဒီမှ ဒေါ်အောင်ဆန်းစုကြည်၏ ရှေ့နေ (၄) ဦးနှင့်လည်း တွေ့ဆုံခဲ့ပြီး မြန်မာနိုင်ငံ၏ တရားစီရင်ရေးဆိုင်ရာ ကိစ္စများကို ဆွေးနွေးခဲ့သည်။

ထို့အပြင် ယမန်နေ့က ရခိုင်ပြည်နယ်ရှိ စစ်တွေအကျဉ်းထောင်နှင့် ဘူးသီးတောင်အကျဉ်းထောင်သို့လည်း သွားရောက်ကာ နိုင်ငံရေးအကျဉ်းသားအချို့နှင့်တွေ့ဆုံခဲ့ပြီး ယနေ့တွင် အင်းစိန်အကျဉ်းထောင်သို့ သွားရောက်ခဲ့သည်။
http://www.khitpyaing.org/news/February%2010/18210a.php