ဘာ အခုမှကြောက်ပါပြီလည်း..

အွန်လိုင်းလုံခြုံမှု သက်သေခံလက်မှတ် စနစ်သုံးရန် စစ်အစိုးရစီစဉ်
စိုးမိုး / ၁၂ ဇန်န၀ါရီ ၂၀၁၀
နအဖစစ်အစိုးရ၏ ရုရှနှင့် မြောက်ကိုရီးယားခရီးစဉ် လျှို့ဝှက်မှတ်တမ်းများ၊ လျှို့ဝှက်စီမံကိန်းများ ပေါက်ကြားခဲ့ပြီးနောက် စစ်အစိုးရက သတင်းအချက်အလက် လုံခြုံရေးအတွက် အွန်လိုင်းလုံခြုံမှု သက်သေခံလက်မှတ်စနစ် အသုံးပြုရန် အပူတပြင်း စီစဉ်နေသည်။

ယခုလ (၉) ရက်နေ့တွင် လှိုင်မြို့နယ် မြန်မာအင်ဖိုတက်တွင် စစ်အစိုးရ ဆက်သွယ်ရေး ဒု-၀န်ကြီးကို ကွန်ပျူတာ ပညာရှင်များက အွန်လိုင်းလုံခြုံမှု သက်သေခံလက်မှတ်စနစ် အကောင်အထည်ဖော်ရေး၊ နည်းဥပဒေပိုင်းဆိုင်ရာ လိုအပ်ချက်များကို အသေးစိတ် ညှိနှိုင်းဆွေးနွေးခဲ့ကြသည်။

“ပေးပို့သူဟာ သူဖြစ်ကြောင်း သေချာဖို့၊ ရတဲ့စာကို ဖိုင်လက်ခံရမည့် သူသာလျှင် ဖွင့်နိုင်ဖို့၊ ကြားကဖောက်ဖတ်ခြင်း ကူးယူခြင်းရှိပါက ပျက်စီးသွားစေဖို့ အသုံးပြုတဲ့ စနစ်တခု လာအိုလို၊ အီရန်လို နိုင်ငံတွေမှာတောင် သုံးနေတယ်။ ကမ္ဘာမှာ အဲဒီစနစ်မသုံးတာ မြန်မာတနိုင်ငံတည်းရှိတယ်” ဟု မြန်မာနိုင်ငံကွန်ပျူတာပညာရှင်အသင်းဝင် ကွန်ပျူတာပညာရှင်တဦးက ခေတ်ပြိုင်သို့ ပြောကြားသည်။

အွန်လိုင်းလုံခြုံရေး သက်သေခံလက်မှတ်မှာ e Commerce နှင့် e Government စနစ်ရှိသည့် နိုင်ငံတိုင်းတွင် မဖြစ်မနေ အသုံးပြုကြရပြီး သတင်းအချက်အလက် လုံခြုံမှုအတွက် သုံးရခြင်းဖြစ်ကြောင်း သိရသည်။

အခြားနိုင်ငံများတွင် ယင်းစနစ်အသုံးပြုရန်အတွက် စက်ဝယ်ယူရန်သာ လိုအပ်ပြီး အစိုးရသို့ သုံးစွဲခွင့်လိုင်စင် လျှောက်ထားရယူမှုသာ လိုအပ်သော်လည်း မြန်မာနိုင်ငံတွင် စစ်အစိုးရက ယင်းစက်ကို ပုဂ္ဂလိကသို့ အသုံးပြုခွင့် ပေးမထားသေးကြောင်း၊ အသုံးပြုရန်လည်း နည်းဥပဒေမရှိသေးကြောင်း သိရသည်။

ယင်း အွန်လိုင်းလုံခြုံမှုစနစ်ကို အစ္စရေးမှ လာရောက်ပြသ မိတ်ဆက်ခဲ့ဖူးသော်လည်း မြန်မာစစ်အစိုးရက စိတ်ဝင်စားမှု မရှိခဲ့ကြောင်း၊ ယခုအချိန်မှ အွန်လိုင်း လုံခြုံရေးစနစ်ကို အပူတပြင်း လုပ်ဆောင်နေခြင်းဖြစ်ကြောင်း ကွန်ပျူတာပညာရှင် အသိုင်းအ၀ိုင်းက ပြောကြားသည်။

“ဒီစနစ်ကို တနိုင်ငံလုံး သုံးမယ်ဆိုရင်တော့ သတင်းအချက်အလက် လုံခြုံမှုရှိတာပေါ့။ အီးမေးလ်တွေ ဖောက်ဖတ်လို့ မရဘူး။ စကားပြောတာတွေ ခိုးနားထောင်လို့ မရဘူး။ သိပ်ခက်ခဲတာလည်း မဟုတ်ဘူးလေ။ စက်ဝယ်မယ်၊ ပြီးတော့ တပ်လိုက်မယ်၊ ဒါပဲလိုတယ်” ဟု အဆိုပါ ကွန်ပျူတာပညာရှင်က ပြောကြားသည်။

ယင်းနေ့ ဆွေးနွေးပွဲတွင် စစ်အစိုးရရုံးများနှင့် အဖွဲ့အစည်းများတွင် အဆိုပါစနစ် အသုံးပြုရေး ဆွေးနွေးခဲ့ပြီး လူထုအတွက် ပေးမပေးကိုမူ ဆွေးနွေးမှုမရှိခဲ့ကြောင်း သိရသည်။

ဒု-ဗိုလ်ချုပ်မှူးကြီး မောင်အေး၏ ၂၀၀၆ ခုနှစ် ရုရှခရီးစဉ်နှင့် ၂၀၀၈ ခု နိုဝင်ဘာလအတွင်း ဗိုလ်ချုပ်ကြီး သူရရွှေမန်း တရုတ်နိုင်ငံမှ တဆင့် သွားရောက်ခဲ့သော မြောက်ကိုရီးယားခရီးစဉ် မှတ်တမ်းများ ပေါက်ကြားပြီးနောက်ပိုင်း စစ်အစိုးရက သတင်းအချက်အလက် လုံခြုံရေးစနစ်ကို စိတ်ဝင်စားလာခြင်းဖြစ်ကြောင်း ကွန်ပျူတာပညာရှင်အသိုင်းအ၀ိုင်းက ကောက်ချက်ချ ပြောဆိုနေကြသည်။
http://www.khitpyaing.org/news/January%2010/12110a.php