“ပညာမတတ်ရင်စစ်ထဲဝင်မှာပေါ့”

မောင်ချင့်ချိန်

၁၉၉၀ ခုနှစ် စက်တင်ဘာလက မန္တလေးမှာတကယ်ဖြစ်ခဲ့တဲ့အဖြစ်အပျက်တခုပါ ။ နှစ်၂၀ ဆိုတဲ့ ကာလကြောင့် ဘယ်မြို့နယ်ဘယ်ကျောင်းဘယ်ရက်လို့တော့ အတိအကျမမှတ်မိတော့ပါဘူး ၊ ဖြစ်ပုံကဒီလိုပါ ။
ကျွန်တော် မန္တလေးထောင်(နန်းတွင်း)ရဲ့ ၂တိုက်ထဲမှာရှိနေချိန်တစ်ညနေမှာ တိုက်ထဲကိုလူသွင်းတဲ့အသံ ဆူညံဆူညံတွေကြားတာကြောင့် ထုံးစံအတိုင်းတိုက်ရှေ့ ရေမြောင်းပေါက်သေးသေးလေးကနေ စပ်စုလိုက်ပါတယ် ။

(မန္တလေးထောင်ကတိုက်တွေက ၂၄ပေအရှည် ၁၀ ပေအကျယ်ကို တံခါးနှစ်ထပ်နဲ့ဖြစ်ပါတယ် ၊ အတွင်း၁၂ ပေ၁၀ပေကို ကွန်ကရိအမိုးနဲ့ သံတိုင်တံခါးနဲ့ဖြစ်ပြီး ထောင်ပိုင်လှည့်တဲ့နေ့မျိုး ၊ ပြစ်ဒါဏ်ပေးထားတဲ့နေ့မျိုးတွေနဲ့ ညတိုင်းမှာ အဲဒီအထဲမှာပဲနေရပါတယ် ၊ ပုံမှန်တော့မနက်ခြောက်နာရီထောင်ဖွင့်လူစစ်ပြီးတာနဲ့ အတွင်းသံတံခါးလာဖွင့်ပေးပြီး အပြင်သစ်သားတံခါးပိတ်သွားတာကြောင့် ရှေ့ကောင်းကင်မြင်ရတဲ့ အမိုးမဲ့အခန်းလေးထိနေရပါတယ် ၊ တခန်းနဲ့တခန်းကို ၈ပေအမြင့် အုတ်ရိုးတွေကာထားပြီး ရှေ့ဘယ်ညာမှာ၆လက္မလောက်ကျယ်တဲ့အပေါက်နဲ့ အခန်းချင်းဆက်လျက်ရေမြောင်းရှိပါတယ် ၊ ပစ္စည်းပေးပစ္စည်းယူ စကားပြော အဲဒီအပေါက်ကလေးကနေပဲလုပ်ကြပြီး လူသစ်ရောက်လို့မျက်နှာမြင်ဘူးချင်ကြရင်တော့ ထောင်ဝါဒါနဲ့တန်းစီးလစ်တဲ့အချိန် ၈ပေအုတ်ရိုးပေါ်ခုန်တက် အုတ်ရိုးပေါ်ဗိုက်မှောက်စကားပြော ၊ တခါတခါတော့ လဲအခန်းပါရဲရဲကူးလုပ်ကြတာပါပဲ ။ )

ချက်ချင်းကို ၀ုန်းကနဲဒေါသထွက် တောက်ခေါက်ရတဲ့ခံစားမှုဖြစ်သွားလောက်အောင်သိလိုက်ရတာက ၊ ရောက်လာတာ အသက်ဆယ့်သုံးနှစ်ကနေ ဆယ့်ငါးနှစ် အတွင်း ခုနှစ်တန်းနဲ့ရှစ်တန်းကျောင်းသားလေးတွေပါ ၊ ကိုယ်မှ၁၇နှစ်ဆိုတဲ့အချိန် ငယ်လှပြီထင်နေတာ ကိုယ့်ထက်ငယ်တဲ့လူမမယ်လေးတွေကို ထောင်ထဲ (တိုက်ထဲ)မှာတွေ့လိုက်ရတော့ စိတ်မကောင်း ဖြစ်တာနဲ့ဒေါသဖြစ်တာ တပြိုင်ထဲခံစားမိတာပါ ။

ဘယ်လိုဖြစ်လာကြတာလဲ သေချာမေးကြည့်တော့ ကျောင်းမှာအဆောင်သစ်ဖွင့်ပွဲလုပ်တာ ၊ ဗိုလ်ချုပ်ခင်ညွန့်လာဖွင့်ပေးပြီး မိန့်ခွန်းပြော တော့ မိန့်ခွန်းမှာ “သားတို့ပညာတတ်တွေဖြစ်ဘို့လိုတယ်၊ပညာမတတ်ရင်ဘာလုပ်မလဲ”လို့ ပြောတဲ့အချိန် ကျောင်းသားအုပ်ထဲက နေ “ပညာမတတ်ရင်စစ်ထဲဝင်မှာပေါ့” လို့ တစ်ယောက်ကအော်လိုက်တော့ “ဟေး” ဆိုပြီး လက်ခုတ်တွေဝိုင်းတီးကြတာကြောင့် ဗိုလ်ချုပ်ခင်ညွန့်ရှက်ပြီး အသံကြားရာတ၀ိုက်ကကျောင်းသားမှန်သမျှ ဖမ်းစစ်ခိုင်း လို့ ပါလာကြတာပါတဲ့ ။

စစ်တပ်ကအာဏာသိမ်းပြီးတာ၂နှစ်ပြည့်ပြီဖြစ်တဲ့အဲဒီအချိန်ထိ မန္တလေးကိုနိုင်နင်းအောင်မအုပ်ချုပ်နိုင်သေးပါဘူး၊ သံဃာတော်တွေရဲ့ဦး ဆောင်မှုနဲ့ မစိုးရိမ်တိုက် ဟောင်းတိုက်သစ် ၊ ဘုရားကြီးတိုက်စတဲ့ဘုန်းကြီးကျောင်းတွေမှာ ကျောင်းသား တွေစုရုံး ၊ သမဂ္ဂရုံးတွေဖွင့်နဲ့ သပိတ်စခန်းလိုနေနိုင်နေကြပြီး ရှစ်လေးလုံး အရေးတော်ပုံ၂နှစ်ပြည့်နေ့မှာတောင် မန္တလေး တစ်မြို့လုံးကို သံဃာနဲ့ကျောင်းသားတွေ စီတန်းလမ်းလျောက်လှည့်နိုင်ခဲ့တာပါ ၊ မန္တလေးကျောင်းသားထုရဲ့ အဲဒီအချိန် နိုင်ငံရေးနိုးကြားမှုက အခြေခံပညာကျောင်းသားလေးတွေတောင် ဗိုလ်ချုပ်ခင်ညွန့်လိုအဆင့်ကို ထပြောင်ရဲလောက် အောင် အံ့မခန်းရှိခဲ့တာပါပဲ ။

တက်ကြွစိတ်ကြောင့်နဲ့ ဗိုလ်ချုပ်ခင်ညွန့်တဘက်စောင်းနင်းပြောနေမှုတွေကိုမခံချင်လို့ ဦးဆောင်ထအော်သူနောက်က ညာသံပေးလိုက်သာအော်ခဲ့ကြတာ တကယ်တမ်းက ခလေးတွေသာဖြစ်ကြတဲ့အလျောက် ထောင်ရဲ့ဒုက္ခဆိုတာတွေနဲ့ နဘူးတွေ့ဒူးတွေ့လဲတွေ့လာရရော ငိုတဲ့သူငို ၊ ညည်းတဲ့သူညည်းပေါ့ ၊ အဲဒီတော့ ရှစ်လေးလုံးအရေးတော်ပုံ ၂နှစ်ပြည့်နေ့ စီတန်းလှည့်လည်မှုကနေ အဖမ်းခံရပြီးရောက်လာတဲ့ မန္တလေးခရိုင်အခြေခံပညာကျောင်းသားသမဂ္ဂရဲ့ အတွင်းရေးမှုး မိုးကျော်လေး(သူလဲအသက်၁၇နှစ်)နဲ့တိုင်ပင်ပြီး ခလေးတွေ(ပြောသာပြောရတယ် ကိုယ်တွေကလဲခလေးကြီးတွေသာပါ)စိတ်ဓါတ်မြှင့်တင်ရေးလုပ်ကြတာပေါ့ ၊ နိုင်ငံရေးသီိချင်းတွေဆိုပြတာ ၊မိန့်ခွန်းပြောတာတွေ လုပ်ကြတာပေါ့ ၊ကျောင်းသားသမဂ္ဂကိုအသိမှတ်ပြုစိတ် ၊ သူတို့ခေါင်းဆောင်ကိုအသိမှတ်ပြုစိတ် ကလေးတွေ ဆီိမှာရှိတယ်ဆိုတာ မိုးကျော်လေးလဲ မိန့်ခွန်းပြောပြီးရော အားလုံးလက်ခုတ်ဝိုင်းတီးပြီးကျောင်းသားသမဂ္ဂသီချင်းဝိုင်းဆိုကြတာ ၊ နောက်နေ့တိုက်ပိတ်ခံကြရတဲ့ အထိပါပဲ ။

မိုးကျော်လေးရဲ့မိန့်ခွန်းကိုမှတ်မိသလောက်ပြန်ပြောရရင် “ရဲဘော်တို့…..။ ဒီနေ့စစ်တပ်က ပြည်သူကိုမတရားအနိုင်ကျင့် ဖိနှိပ်နေမှုတွေ ကြောင့် လူတွေက ရွံမုန်းပြီး စစ်ထဲဝင်မဲ့သူမရှိဖြစ်နေတာ ၊ အိမ်ပြေးတွေ ၊ အခြေအနေမဲ့တွေ ၊ အမှုအခင်း ကျူးလွန်မိသူတွေ ၊ရီးစားနဲ့အဆင်မပြေဖြစ်အသဲကွဲသူတွေ၊ စာမေးပွဲကျလို့ဘာကြောင့်ညာကြောင့်စိတ်ညစ်နေသူတွေသာ စစ်တပ်ထဲရောက်နေကြတာ ၊ ခင်ညွန့်ကို ပညာမတတ်ရင်စစ်ထဲဝင်မှာပေါ့လို့ လှောင်ပြောင်ခဲ့တာ မင်းတို့အမှန်ပဲ ၊ ကိုယ်မှန်တယ်ထင်ရာကိုလုပ်ပြီး ဒီိထောင်ဆိုတဲ့အခြေနေဆိုးကြီးတွေ့ရတာ ငါတို့ဘာမှဝမ်းနည်းနေစရာမလိုဘူး ၊ မင်းတို့ ငါတို့လို လူမမယ်ခလေး တွေကို ၊ လက်နက်မဲ့ကျောင်းသားတွေကို ခင်ညွန့်လိုစစ်ဗိုလ်ချုပ်တွေက ရန်သူကြီးတွေလို ကြောက်ပြီး ထောင်ထဲပို့လိုက်တာ ငါတို့မင်းတို့အတွက် ဂုဏ်ယူစရာ တောင်ကောင်းသေးတယ် ၊ ငါတို့ အခြေခံပညာကျောင်းသားတွေရဲ့သမိုင်းသစ်ကို ဖွင့်လိုက်ပြီ ၊ စိတ်ဓါတ်မကျကြနဲ့ မင်းတို့ငါတို့နောက်မှာ ငါတို့ပြည်သူတွေ ရှိတယ်”တဲ့။

အဲဒီကလေးတွေရဲ့ အင်မတန်ချီးကျူးစရာအကောင်းဆုံးကိစ္စကတော့ သူတို့ကို MI1 စစ်ထောက်လှမ်းရေးတစ်ကနေ ဘယ်သူစအော်တာလဲ ၊ ဘယ်သူတွေက မြှောက်ပေးနေတာမျိုးရှိလဲဆိုတာ နေ့တိုင်းလို ခြောက်လိုက်ချော့လိုက်နဲ့ လာလာစစ်နေတာ ၊ တစ်လကျော်လောက်နေတော့ မိဘတွေပါခန်ဝံလုပ်ပြီး လွတ်သာ သွားကြတယ် ၊ လုံးဝမဖေါ် သွားပါဘူး ။

ကြာခဲ့ပြီ ၊ နှစ်၂၀ ပင်ပြည့်တော့မည် ။ “ပညာမတတ်ရင်စစ်ထဲဝင်မှာပေါ့” ဆိုတဲ့ကလေးတွေ ပညာတတ်ကြီးတွေဖြစ်ပြီး စစ်တပ်နဲ့ကင်းကင်းနေရင်း လုပ်ငန်းခွင် တွေမှာဝင်နေလောက်ပြီ ၊ အဲဒီခလေးတွေရဲ့ အဲဒီကာလကစိတ်ဓါတ်မျိုး ၊ အမြင်မျိုး ခုအခြေခံပညာကျောင်းသားတွေရော တက္ကသိုလ်ကျောင်းသားတွေမှာပါ ဘယ်လောက်ရှိနိုင်မလဲ တွေးရင်း…,

မျှော်လင့်ရင်း…… ။
ကြီးကြီးငယ်ငယ်သော ကျောင်းသားထုအားဦးညွတ်အလေးပြုလျက်

၄၈ နှစ်မြောက် 7JULY နေ့အမှတ်တရ ။

မောင်ချင့်ချိန်