ပါတီရောင်းတယ်...ပါတီဝယ်တယ်... အရုပ်နဲ့လဲတယ်.. မုန့်နဲ့လဲတယ်

ပအိုဝ်းပါတီဝင်များကို ကြံဖွံ့ပါတီ ထံ ရောင်းချ၊ ဒေသခံ မကျေနပ်မှု ဖြစ်
သတင်းနှင့် မီဒီယာ ကွန်ယက်။ ခွန်အောင်မြတ်။
စက်တင်ဘာလ ၁၆ ရက်၊ ၂၀၁၀ ခုနှစ်။

ရှမ်းပြည်နယ်တောင်ပိုင်းတွင် ကြံခိုင်ရေးနှင့်ဖွံ့ဖြိုးရေးပါတီသည် ပါတီဝင် ၄၀ ရာခိုင်နှုန်းကို ပအိုဝ်းအမျိုးသား အဖွဲ့ ချုပ် (PNO) ပါတီ ထံတွင် ၀ယ်ယူရာ ပအိုဝ်းလူမျိုး အများစုက မကျေ မနပ်ဖြစ်နေသည်ဟု ယင်းအဖွဲ့များနှင့် နီး စပ်သူက ပြောသည်။

ယခုရက်ပိုင်းအတွင်းက ကြံ့ခိုင်ရေးနှင့် ဖွံ့ဖြိုးရေးပါတီက ပအိုဝ်းလူမျိုးကို ၂၀ ရာခိုင်နှုန်း ထပ်မံ ၀ယ်ယူ သည်ဟု တောင်ကြီး မြို့ခံတဦးက ပြောသည်။

“အခု ကြံ့ခိုင်ရေးနဲ့ ဖွံ့ဖြိုးရေး ပါတီက လိုချင်တဲ့ လူ ၂၀% ရာခိုင်နှုန်းက သူတို့ ပအိုဝ်းအမျိုးသား အ ဖွဲ့ချုပ် PNO ဆီမှာ ၀ယ်တယ်လို့ ကြားတယ်။ အရင်တုန်းကလည်း ၂၀% ရာခိုင်းနှုန်းဝယ်ပြီးပြီ။ အခု ၂၀ % ရာနှုန်း ထပ်ဝယ်လို့ ရယက ဥက္ကဌ တယောက်က ပြောပြတယ်။”

ပအိုဝ်းအမျိုးသားအဖွဲ့ချုပ်က ၎င်း၏ လူထုထံတွင် ပါတီရံပုံငွေ ကောက်ယူနေသည့်အပြင် ယခုလို ကြံ့ခိုင်ရေးနှင့် ဖွံ့ဖြိုးရေး ပါတီထံ အဖွဲ့ဝင် အင်အားများကို ရောင်းချသည့်အတွက် ဒေသခံများက မကျေမနပ် ဖြစ်နေသည်ဟု ဒေသခံ တဦးက ပြောသည်။

“ကျနော်တို့ ပအိုဝ်းလူမျိုးက ကုန်စိမ်းပစ္စည်းနဲ့ သိပ်မကွာတော့ဘူး။ ရင်နာတယ်ကွာ။ အခု ၀ယ်တာ က ကြံ့ဖွံ့က ၀ယ်တာ ဘယ်သူက ဦးဆောင်ပြီးဝယ်တာလဲဆိုတာကတော့ မသိဘူး။ ၀ယ်တာကလည်း PNO လူကြီးတွေဆီမှာ ၀ယ်တာလေ။ အခုဝယ်တာက ပါတီဝင်လုပ်ခိုင်းဖို့ ၀ယ်တာ။ ပြီးရင် ရွေး ကောက်ပွဲအချိန်မှာ သူတို့ပါတီကို မဲပေးဖို့ပေါ့။ ပအိုဝ်းတောင် မဖြစ်ချင်တော့ဘူးဗျာ။”

ပအိုဝ်းအမျိုးသားအဖွဲ့ချုပ် ပါတီသည် ၎င်းတို့ ရထားသည့် ကိုယ်ပိုင်အုပ်ချုပ်ခွင့်ရ ဒေသ အချို့ဖြစ် သည့် ဆီဆိုင်၊ ဟိုပုံးနှင့် ပင်လောင်းမြို့နယ် သုံးခုတွင်သာ ရွေးကောက်ပွဲ ယှဉ်ပြိုင်မည်ဖြစ်ပြီး ကျန်သည့် လွိုင်လင်၊ မောက်မယ်၊ နမ့်စန်စသည့် မြို့နယ်များတွင် ကြံ့ခိုင်ရေးနှင့် ဖွံ့ဖြိုးရေး ပါတီ အတွက် မဲဆွယ် စည်းရုံးပေးမည်ဟု ဒေသခံများက ပြောသည်။