ကိုဝိုင်း | ကြာသပတေးနေ့၊ စက်တင်ဘာလ ၀၂ ရက် ၂၀၁၀ ခုနှစ် ၂၁ နာရီ ၄၀ မိနစ်
အီးမေးလ်ပို့ရန် ပရင့်ထုတ်ရန် PDF ဖိုင်ရယူရန်
ချင်းမိုင် (မဇ္ဈိမ)။ ။ ၁၉၈၈ ခုနှစ် ရှစ်လေးလုံးကာလတွင် လူအများ၏ အားထားမှုကို ခံခဲ့ရသော BBC မြန်မာဌာနအနေဖြင့် ယင်းကဲ့သို့ အရေးအခင်းတခု ထပ်မံပေါ်လာလျှင် ပိုမိုကျယ်ပြန့်စွာ တင်ပြနိုင်မည်ဟု BBC မြန်မာဌာန နှစ် ၇ဝ ပြည့် ယနေ့တွင် ဌာနမှူး ဒေါ်တင်ထားဆွေက ပြောဆိုလိုက်သည်။
၁၉၄ဝ ခုနှစ် စက်တင်ဘာလ ၂ ရက်နေ့တွင် BBC မြန်မာပိုင်းအစီအစဉ်ကို စတင်ခဲ့ရာ ရှစ်လေးလုံး လူထုလှုပ်ရှားမှုကာလ၌ မြန်မာလူထုသည် BBC သတင်းများကို နားထောင်ပြီး အခြေအနေ အရပ်ရပ်ကို သုံးသပ်ခဲ့ကြရသည်။ ရှစ်လေးလုံး သပိတ်ခေါ်သံကိုလည်း တနိုင်ငံလုံးသို့ အချိန်ကိုက် ထုတ်လွှင့်ပေးနိုင်ခဲ့သဖြင့် BBC သတင်းထောက် ခရစ်စတိုဖာ ဂါးနက်ဆိုသည့် အမည်သည်လည်း လူသိများသွားခဲ့သည်။
အခုနေသာ အဲဒီလို အရေးအခင်းမျိုး သတင်းထုတ်လွှင့်ရမယ်ဆိုရင်တော့ ဒီထက်ပိုပြီး ကျယ်ကျယ်ပြန့်ပြန့်၊ မြန်မြန်ဆန်ဆန် တင်ပြနိုင်မယ်” ဟု ဒေါ်တင်ထားဆွေက မဇ္ဈိမကို ပြောသည်။
ယင်းကာလ၌ BBC ပြည်တွင်းသတင်းထောက် မရှိခြင်းနှင့် ဆက်သွယ်ရေး နည်းပညာများ အားနည်းခဲ့သောကြောင့် အချက်အလက် မှန်ကန်စွာ ဖော်ပြနိုင်ရေး အခက်အခဲရှိပြီး သတင်း ထုတ်လွှင့်ရာတွင်လည်း ကြန့်ကြာနှောင့်နှေးမှုအချို့ ရှိခဲ့သည်ဟု သူက ဆိုသည်။
၁၉၈၈ မတိုင်မီက သတင်းများကို ဘာသာပြန် လွှင့်ထုတ်သော်လည်း ၁၉၈၈ ကာလမှစ၍ ကိုယ်တိုင်သတင်းရယူသည့် အဆင့်သို့ “တဖြည်းဖြည်း” ကူးပြောင်းလာခဲ့ခြင်းကို ကြီးမားသည့် ပြောင်းလဲမှုဟု ရှုမြင်ကာ၊ ယခုတိုင် စိန်ခေါ်မှုများ ရှိနေသေးပြီး ပြည်တွင်းပရိသတ်၏ ယုံကြည်မှုကို ရယူနိုင်ရန် သတင်းများ တိကျစေရေး၊ နှစ်ဘက်မျှတစေရေး၊ ဝါဒဖြန့်ချိသည့် သတင်းဌာန မဖြစ်စေရေးတို့သည် အဓိက စိန်ခေါ်ချက်များ ဖြစ်နေသေးကြောင်း ဒေါ်တင်ထားဆွေက ပြောသည်။
စစ်အစိုးရကမူ “VOA, BBC - ရန်တိုက်ပေးနေသည်။ RFA, DVB - သွေးထိုးနေသည်” ဟု နေ့စဉ်ထုတ် သတင်းစာများတွင် ရေးသားဖော်ပြလေ့ရှိသည်။ ဘက်လိုက်ဖော်ပြနေသည်ဟုလည်း စွပ်စွဲလေ့ရှိသည်။
BBC ကို ငယ်စဉ်ကပင် ကြားလာ၊ နားထောင်လာခဲ့ရသည်ဟုဆိုသူ ပြည်ပအခြေစိုက် မြန်မာသတင်းသမဂ္ဂ ဒုဥက္ကဋ္ဌ ဦးဇင်လင်းကမူ ၁၉၇၄-၇၆ ဦးသန့်နှင့် မှိုင်းရာပြည့် “အရေးတော်ပုံ” များ ဖြစ်ပြီး၊ နောက်ပိုင်းတွင် BBC ကို နားထောင်သူ ပြည်တွင်း၌ ပိုများလာခဲ့သည်ဟု သုံးသပ်သည်။
“ပြည်တွင်းမှာ သတင်းရစရာ source (သတင်းရင်းမြစ်) က ဘာမှမရှိဘူး။ နည်းနည်းခိုင်ခန့်တဲ့ သတင်းရဖို့ဆိုရင် BBC ပဲ အားကိုးရတာပေါ့။ BBC အချိန်ကျရင် အိမ်အမြန်ရောက်အောင် ပြန်ပြီးတော့ ဖွင့်နားထောင်ကြတာ။ Bias (ဘက်လိုက်ခြင်း) ဆိုတဲ့ စကားနဲ့ ပတ်သက်ရင်တော့ သတင်းကိုမှန်အောင် ကြိုးစားတဲ့အခါကျရင် မှန်တဲ့ဘက်ကို လိုက်ရတာပဲ” ဟု သူက ပြောသည်။
ယခင်က ပြည်ပအခြေစိုက် အသံလွှင့်ဌာန BBC နှင့် VOA သတင်းဌာန နှစ်ခုသာ ရှိခဲ့သော်လည်း ယခုအခါ RFA ၊ DVB တို့လည်း ရှိလာသဖြင့် ပရိသတ်အတွက် ရွေးချယ်ခွင့် ပိုရှိလာသော်လည်း အသံလွှင့်ဌာနများအတွက်မူ စိန်ခေါ်မှုများ ဖြစ်သည်ဟု ဒေါ်တင်ထားဆွေက ဆိုသည်။
“အဓိကစိန်ခေါ်မှုက ကိုယ့်ရဲ့ ပရိသတ်က တခြားဘက်ကို ပါသွားနိုင်တာပေါ့။ သို့သော် competition (ယှဉ်ပြိုင်မှု) ရှိလေ ကိုယ်က ကြိုးစားရလေ။ ကိုယ့်သတင်းကို ပိုပြီး တန်ဖိုးရှိအောင်၊ ခိုင်မာအောင်၊ ပိုမျှတအောင် လုပ်လာရတဲ့အတွက် ကောင်းတဲ့ အချက်တခုလို့ပဲ ယူဆပါတယ်” ဟု သူက ပြောသည်။
အသံလွှင့်ဌာန ၄ ခုလုံးကို ပုံမှန်နားထောင်သည်ဟုဆိုသူ ရန်ကုန်အခြေစိုက် ပိတောက်ပွင့်သစ် မဂ္ဂဇင်း အယ်ဒီတာချုပ် စာရေးဆရာ မောင်စိန်းနီက BBC ၏ အစီအစဉ်အားလုံးကို ကြိုက်သော်လည်း အသံလှိုင်းကို ပိုကြည်လင်စေလိုသည်ဟု အကြံပြုသည်။
“Highlight လုပ်တာ၊ ပိုပြီးထက်မြက်တာ ပေးဖို့လိုအပ်တယ်လို့ ထင်တာပဲဗျာ။ လူထုနှလုံးသားထဲကို တန်းဝင်သွားနိုင်တဲ့ သတင်းမျိုးလေးတွေပေါ့နော်။ ဥပမာဆိုရင် အကုန်လုံးလိုပဲ လဲလိုက်ပြီလို့ ကြားတယ် ပထမ။ အခု ၂ ယောက် ကျန်နေတယ်ကြားတယ်။ အဲလိုမျိုးတွေပေါ့” ဟု မကြာသေးခင်က မြန်မာစစ်တပ် ထိပ်ပိုင်းခေါင်းဆောင်များ အပြောင်းအလဲ သတင်းနှင့်ပတ်သက်၍ သူက ပြောဆိုသည်။
ဗြိတိန်နိုင်ငံ စီးပွားရေးကျဆင်းနေသဖြင့် လန်ဒန်မြို့အခြေစိုက် BBC နိုင်ငံတကာ သတင်းအစီအစဉ်အတွက် ဗြိတိန်အစိုးရ နိုင်ငံခြားရေးဝန်ကြီးဌာနက ထောက်ပံ့ငွေများလည်း ၂ဝ၁၁ ခုနှစ်နောက်ပိုင်း လျော့သွားဖွယ်ရှိကြောင်း သိရသည်။ သို့သော် မြန်မာဌာနကိုမူ ထိခိုက်မှုနည်းမည်ဟု ဌာနမှူး ဒေါ်တင်ထားဆွေက ပြောသည်။Rest of your post
Thursday, September 2, 2010
လူထု လှုပ်ရှားမှုအတွက် BBC အဆင်သင့် ရှိနေ
Subscribe to:
Post Comments (Atom)
No comments:
Post a Comment